📸 Ýer şarynyň gözellikleri we tebigatyň täsin pursatlary täze fotosuratlarda mälim edildi

Daşky gurşawyň täsinlikleri, haýwanat dünýäsiniň gizlin syrlary we pasyllaryň çalyşmagy bilen döreýän tebigy gözellikler hemmeleri haýran galdyrýar. Ýaňy-ýakynda dünýäniň dürli künjeklerinde ýabany tebigatyň iň seýrek pursatlaryny we gyş paslynyň döreden täsinliklerini görkezýän iri taslamalaryň hem-de bäsleşikleriň netijeleri jemlendi.

Meşhur «National Geographic» neşiri ekoulgamlary gorap saklamak meselelerine we haýwanlaryň özboluşly durmuşyna bagyşlanan ýabany tebigatyň täze fotosuratlaryny görkezdi. Bu görnüşler mör-möjekleriň gizlin durmuşyndan başlap, seýrek duş gelýän altyn languryň nazaryna çenli örän möhüm pursatlary öz içine alýar. Suratlarda ýaltajygyň (leniwes) syýahaty, towşanyň gaçyp gutulyşy, Teýku atly gaçygaplaň çagasynyň ilkinji günleri, şeýle hem aýy çagalarynyň, gotanyň we pumanyň täsin pursatlary şekillendirilýär. Taslamanyň guramaçylary bu seýrek şekilleriň diňe bir gözellik bolman, eýsem howanyň üýtgemegi ýaly möhüm ekologik meselelere üns çekmäge niýetlenendigini nygtaýarlar.

• «Köwekden ary öýjügine: mör-möjekler koloniýasynyň gizlin durmuşy» / © ingoarndtphotography

• «Ele salmaz altyn: altyn languryň nazary» / © joelsartore

• «Haýal ýol: üýtgeýän dünýäde ýaltajygyň (leniwes) syýahaty» / © emmanuel.tardy

• «Preldäki pursat: towşanyň pireneý dag pişiginden gaçyp gutulyşy» / © alexandrovich_yo

• «Teýku atly gaçygaplaň çagasynyň durmuşynyň ilkinji günleri» / © joelsartore

• «Ýabany tebigatyň nazary: puma çagasy obýektiwiň öňünde» / © ladzinski

• «Katmaý kenaryndaky (ABŞ) goňur aýynyň çagalary» / © acacia.johnson

• «Küdür gotan kämil yşyklandyrmada» / © tony_wanders_photo

Şol bir wagtda, Demirgazyk Amerikada dünýäniň iň meşhur şaglawuklarynyň biriniň gyşky jadylaýjy görnüşini beýan edýän «Niagara Frozen Falls 2026» atly surat bäsleşiginiň netijeleri yglan edildi. Bäsleşikde akýan suwuň durnukly güýji bilen gyşky peýzažyň parahat asudalygyny ajaýyp utgaşdyran «Mytny Photography» studiýasy birinji orna mynasyp boldy. Şeýle hem Ajo Metýu we Rob Miller dagynyň kinematografik işleri tebigatyň gazaply asylky güýjüni görkezip, baýrakly orunlary eýelediler. Hünärmenleriň bellemegine görä, Niagara güýçli akymy sebäpli hiç haçan doly doňmaýar, ýöne onuň daş-töweregini örtýän buzly duman sebäpli göz öňünde täsin bir «doňup galmak» illýuziýasy emele gelýär.

• Niagaranyň doňan şaggyldysy / Birinji orny eýelän surat /© Mytny Photography (The  The Frozen Roar of Niagara) 

• Niagaranyň gyrasynda doňup galan ot / ikinji ýeri eýelän surat / © Ajo Mathew (Frozen Fire at the Edge of Niagara)

• Niagaranyň doňan ybadathanasynyň astynda / üçünji orny eýelän surat ​/ © Rob Miller (Beneath Niagara’s Frozen Cathedral)

Bu fotosuratlardaky pursatlar adamzat bilen ýabany tebigatyň arasyndaky aýrylmaz baglanyşygy we planetamyzyň gaýtalanmajak täsin gözelliklerini ýene-de bir gezek ýüze çykarýar.