«Ýaş tebigatçy» jemgyýetçilik guramasy Türkmen oba hojalyk institutynda guralan ekologiýa çäresine gatnaşdy

Ýakynda Türkmen oba hojalyk institutynda ÝUNESKO-nyň işleri barada Türkmenistanyň Milli toparynyň sekretariatynyň, Bilim ministrliginiň hem-de institutyň bilelikde guramagynda «Tebigatymyzy bilelikde goralyň!» atly maslahat geçirildi. Bu çärä «Ýaş tebigatçy» jemgyýetçilik guramasy hem işjeň gatnaşdy.

Çäräniň dowamynda gatnaşyjylar Garagumuň baý tebigatyny we milli gymmatlyklarymyzy şöhlelendirýän, şeýle-de bu ýokary okuw mekdebiniň ÝUNESKO klubunyň agzalarynyň taýýarlan işlerini görkezýän sergä aýlanyp gördüler. Maslahatda ählumumy ekologiýa howpsuzlygy, suwdan tygşytly peýdalanmak we ýurdumyzy bagy-bossanlyga öwürmek boýunça alnyp barylýan döwlet maksatnamalary ara alnyp maslahatlaşyldy.

Maslahatyň dowamynda «Ýaş tebigatçy» jemgyýetçilik guramasynyň başlygy Leýli Şyhmädowa çykyş edip, tebigaty goramagyň we ekologik durnuklylygy üpjün etmegiň döwlet syýasatynyň ileri tutulýan ugry bolup durýandygyny aýratyn belledi. Ol guramanyň döredilen gününden bäri ýaşlaryň we meýletinçileriň arasynda ekologik bilimi ýaýratmak, olarda tebigata bolan aýawly garaýşy terbiýelemek ugrunda yzygiderli işleri alyp barýandygyny nygtady.

Ekologiýa forumy aýdym-sazly çykyşlar hem-de «Köneürgenç» taryhy-medeni goraghanasyna guralan baý mazmunly gezelenç bilen jemlendi.