Ählihalk bag ekmek dabarasynda 611 müňden gowrak nahal ekildi

21-nji martda Hormatly Prezidentimiz Serdar Berdimuhamedowyň gatnaşmagynda ýurdumyzda ählihalk bag ekmek dabarasy geçirildi. Ýurdumyzda ekologiýa abadançylygyny üpjün etmäge we durnukly tebigy gurşawy kemala getirmäge gönükdirilen Milli tokaý maksatnamasy durmuşa geçirilýär. Ählihalk bag ekmek dabarasynyň barşynda ýurdumyz boýunça 611 962 düýp agaç nahaly oturdyldy, şeýle hem 2 024 240 düýp agaja ideg işleri geçirildi.

Çärä Mejlisiň Başlygy, Ministrler Kabinetiniň Başlygynyň orunbasarlary, ministrlikleriň we pudaklaýyn dolanyşyk edaralarynyň ýolbaşçylary, daşary döwletleriň we halkara guramalaryň ýurdumyzdaky wekilhanalarynyň ýolbaşçylarydyr wekilleri, şeýle hem giň jemgyýetçilik gatnaşdy. Bu barada TDH habar berýär.