🐆 «Bulutly ýaguar» on ýyldan soň gaýtadan göründi: seýrek duş gelýän pursat

Gondurasyň belent daglarynda hakyky tebigy täsinlik hasaba alyndy: eýýäm on ýyl bäri gözden ýiten «bulutly ýaguar» ahyry fotoduzaklara düşdi. Bu erkek ýaguar Sýerra-del-Merendon gerişlerinde, deňiz derejesinden 2200 metr belentlikde ýeke özi gezip ýören eken.

Oňa hemişe bulutly dag tokaýlarynda ýaşaýandygy üçin şeýle at berlipdir. Bu ýaguarlar belent daglaryň çygly şertlerinde gizlin ýaşamaga ukyplydyr.

Fotoduzaklara düşen görnüşler ýyrtyjynyň saglyk ýagdaýynyň örän gowudygyny görkezýär — ol barmasy kyn bolan gür tokaýlykda arkaýyn hereket edýär. Bu sebitiň 1987-nji ýyldan bäri goralmagy ýerli ekoulgam üçin uly ähmiýete eýedir. Iri pişikler maşgalasynyň wekilleriniň, şol sanda 2021-nji ýylda 17 ýyllyk arakesmeden soň peýda bolan pumalaryň görülmegi, ýerli tebigatyň täzeden dikelýändiginiň aýdyň subutnamasydyr.

Ýaguarlaryň taryhyna ser salsak, olar Demirgazyk we Günorta Amerikanyň giň meýdanlarynda ýaşapdyrlar. Emma Tebigaty goramagyň halkara birleşiginiň (IUCN) berýän maglumatlaryna görä, biziň günlerimize çenli olaryň ýaýraw meýdany 49% azaldy. Häzirki wagtda bu ýyrtyjylaryň iň köp sanly toplumy Amazoniýanyň çygly tokaýlyklarynda duş gelýär.