Beýik Britaniýada ýabany tebigatyň iň gowy suratlary saýlandy: BWPA-2026-nyň netijeleri

British Wildlife Photography Awards (BWPA-2026) bäsleşiginiň guramaçylary Birleşen Patyşalygyň täsin tebigatyny şöhlelendirýän her ýylky bäsleşigiň ýeňijilerini mälim etdiler. Bu ýyl bäsleşige 12 müňden gowrak eser hödürlenip, olar haýwanlaryň özüni alyp barşyndan tokaý ekoulgamlaryna çenli jemi 11 ugur boýunça bäsleşdiler. Bäsleşigiň baş baýragyna we "Ýylyň ýabany tebigat fotohünärmeni" diýen ada Pol Hobson mynasyp boldy. Onuň ýeňiji bolan ak-gara suraty Şeffilddäki kölleriň biriniň düýbünde düşürildi. Suratyň esasy gahrymany bolan gurbaga özboluşly rakurs arkaly täsirli wizual görnüşde beýan edilip, tanyş haýwany täzeçe nukdaýnazardan görmäge mümkinçilik berýär. Guramaçylar eýýäm 2027-nji ýylyň bäsleşigi üçin işleri kabul edip başladylar.